الاعتذار تواضع وجمال الروح لذلك الكاتبة الواعدة طيف الحسين تقدم مجموعة اعتذارات.

مجموعة اعتِذارات :

_لكل اللحظات اللي قضيتها وأنا عم أبكي لأنّي ضايعة بلا ما حاول فتّش عالطريق بيوم .

_لكل شي أُمنيّات بقيت معلّقة بخزانة الأيّام لوقت طويل بلا ما ألبسها وأتباهى فيها لو لِلحظة .

_لكل صلاة صلّيتها بسرعة وبدون قصد، غافلة عن مَقولة، " صلّها لترتاح فيها لا لِترتاح مِنها " .

_لكل باب طلعت منه وتركته مفتُوح ورايي .

_لصفّارات الإنذار اللي ع طول بتنبّهني من خطورة تمسُّكي  بالأشخاص الغلط بحياتي ومع هيك بتجاهلها متذرّعة بجملة " أنا ما فيني بلاهن " .

_لكل لحظة وهِم قضيت عُمري عايشة فيها لحد ما استنتجّت بالنّهاية إنو هاد عمري اللي عم ينقضي ويضيع بلا ما حسّ فيه .

_لكل دمعة نزلت من عيون أمّي بسببي بلا ما حسّ فيها .

_لكل وقت هزمني فيه حزني وبكيت بالوقت اللي كنت قادرة حارب الحزن فيه بسجدة بس .

_لكل لحظة تهاونت فيها بزعل حدا بيعنيني .

_لكل كلمة حكيتها وتركت أثر بشع جوّات حدا بلا ما أحسبلها حساب .

_لكل وقت حسّ فيه صديقي بالوحدة وأنا موجود .

_لكل اللحظات اللي وقف فيها الشخص اللي بيعنيني عاجز قدّام أيّ شعور مُوجع بلا ما كون جنبو وعم طبطب ع كتفو .

_لكلّ جروحي اللي تركتها مفتوحة وما اعتنيت فيها وداويتها .

_لطاقتي اللي استهلكتها تِجاه موضوع مُحدّد والنتيجة ع طول " فَشَل" .

_لإيديي اللي تجرّحت وأنا متمسكة بحبل وِصال شخص مُعيّن .

_لأحلامي المكدّسة خلف جملة " يوماً ما " .

_للنّاس اللي بتحبني بلا ما أعرف بوجودها حتّى .

_للي بيتحمّلني وبيحمل منّي بلا ما يحسّسني بشي .

_للي اختَار يكون شَمعة لحتّى يضوّي طريق شخص ما .

_للناس اللي حلمها تمشي بالوقت اللي نحن فيه عم نشكي من صعوبة الركض .

_لكل الجُّمل اللي اخترنا نخبّيها جوّاتنا خوفاً من قسوِة الرّد .

_للأوهام اللي صنعتها لنفسي وعلّقت فيها قلبي بلا ذنب منّو .

_لكل اِسم إلو من دعواتنا نَصيب بلا ما يعرف بقيمتو جوّا قلوبنا .

_للحظات اللي بعطي فيها الأمَل لغيري، بالوقت اللي بكون فيه أنا أكتر حدا بحاجتو .
🌻💙

| طيف الحسين | .